Senswal na chocolate scene nina Bea at Paulo, nag-trend worldwide sa Twitter

ni Maricris Vadlez Nicasio

[divider]

MAINIT na pinag-usapan ng sambayanan ang pinakabagong primetime drama series ng ABS-CBN na Sana Bukas Pa Ang Kahapon na pinagbibidahan ng Movie Queen ng bagong henerasyon na si Bea Alonzo. Patunay dito ang datos mula sa Kantar Media noong Lunes (Hunyo 16) na pumalo ang pilot episode sa national TV rating na 21.7%, o mahigit doble ng nakamit ng katapat nitong programa sa GMA na Ang Dalawang Mrs. Real (10.4%).

Naging mainit na usapin sa netizens ang mga nakakikilig at senswal na eksena ng mga karakter na sina Rose (Bea) at Patrick (Paulo Avelino), kabilang ang detalyadong usapan ng dalawa tungkol sa paggawa ng tsokolate. Dahil dito, naging worldwide trending topics sa microblogging site na Twitter si Paulo at ang hashtag na #SBPAKWhenRoseMetPatrick.

Huwag palampasin ang pagpapatuloy ng magkaugnay na buhay nina Rose at Emmanuelle sa Sana Bukas Pa Ang Kahapon gabi-gabi pagkatapos ng Ikaw Lamang sa ABS-CBN Primetime Bida.