HATAW! D'yaryo ng Bayan hatawtabloid.com
PATAY ang isang lalaking tinaguriang tirador ng manok na panabong, makaraan barilin ng hindi nakilalang suspek habang nakakapit sa bintana ng isang condo unit sa Binondo, Maynila kahapon ng madaling-araw.
Hindi pa nakikilala ang biktimang tinatayang 40-anyos, 5’8 ang taas, katamtaman ang pangangatawan, kayumanggi, nakasuot ng shorts at walang saplot na pang-itaas.
Ayon kay SPO1 Charles John Duran ng Manila Police Distrcit (MPD) Homicide Section, dakong 2 a.m. hinabol ng mga residente ang biktima sa Alvarado St., Binondo dahil sa pagnanakaw ng manok na panabong. Ngunit biglang tumalon ang biktima sa estero at naglaho. Maya-maya lamang, muling naispatan ang biktima na nakakapit sa window grill sa ikaapat na palapag ng condominium sa 915 Masangkay St.
Hinimok ni Kagawad Rico Echalas ang biktima na bumaba ngunit biglang narinig ang sunod-sunod na putok ng baril saka bumagsak sa ilog ang lalaki. Makaraan ang ilang oras, naiahon ang wala nang buhay na katawan ng biktima.
ni LEONARD BASILIO
