Sunday , July 21 2024

Ang huling bigwas sa Estrada dynasty

MARAMI na ang nag-aabang sa pinananabikang desisyon ng Supreme Court sa disqualification case laban kay ousted president at convicted president Joseph ‘Erap” Estrada.

Maituturing kasi itong “fatal blow” o hu-ling bigwas sa Estrada political dynasty na mahigit 40 taon nang namamayagpag sa lipunang Pilipino, at para kay Erap, isa itong bangungot na hindi dapat maganap.

Ang magiging pasya ng Korte Suprema sa DQ case ni Erap ang magiging hudyat sa mga abusadong politiko na kailangang sundin ang mga umiiral na batas sa bansa, tuldukan na ang panlilinlang sa mga mamamayan, wakasan at pagdusahan ang pagnanakaw sa kaban ng ba-yan.

At parang orchestra ang mag-aamang Erap, Jinggoy, at JV sa pagsasabing pinopolitika ang kanilang pamilya kaya nahaharap sa iba’t ibang kaso dahil hindi nila kayang depensahan ang mga sarili sa mga nilabag na batas.

Kaya lahat ng paraan ay kanilang gagawin para hindi madiskuwalipika si Erap bilang Manila mayor para matuloy ang planong kumandidato muli sa 2016 presidential elections, kahit pa ipinangangalandakan niyang magreretiro na siya sa politika.

Paano pa paniniwalaan ang “retirement statement” ni Erap kung mismong ang pangako niyang hindi na tatakbo sa alinmang posisyon sa pamahalaan na ipinangako niya sa gobyerno kaya siya binigyan ng conditional pardon ni GMA ay hindi niya tinupad?

Papayag ba si Erap na biglang gumuho ang political dynasty na kanyang itinatag lalo na’t wala siyang mapagmamanahan ng babakantehing trono dahil makukulong si Jinggoy, may mga kaso rin sa Ombudsman sina JV at keridang si Guia, ang esposang si Loi ay sangkot din pala sa pork barrel scam at ang pamangkin na si ER ay dinis-kuwalipika na ng Comelec bilang Laguna governor?

Dahil santambak ang kuwartang nakamal ng lahing Estrada sa politika, napakadali para sa kanila na gastusin ito, huwag lang maglaho ang kanilang kapangyarihan.

Kaya kaliwa’t kanan ang pinopondohang pagkilos para itambol ang kampanyang may kinikilingan ang administrasyong Aquino sa pagsu-sulong ng mga pork barrel scam case, at ang pinag-iinitan lang ay sina Jinggoy, Juan Ponce-Enrile at Bong Revilla.

Ginagawa nilang tuntungan ito para ilihis ang isyu palayo sa kanila at ituon kay PNoy bilang kunsintidor na Pangulo hanggang mawala na ang tiwala ng taong bayan sa kanya at maluklok bilang kapalit niya si VP Jojo Binay, para maisalba sina JPE at Revilla, at ang Estrada dynasty.

Kung bibigay ang Malacañang sa “pressure” at hindi isampa ng Ombudsman ang mga kaso laban sa tatlong senador sa Sandiganbayan, ang ibig sabihin, ay may presyo rin pala ang rule of law sa ilalim ng administrasyong Aquino.

“SEXY” AT JINGGOY, IISA

KAHIT anong paglihis sa isyu ang gawin ng kampo ng pork barrel senators, malinaw na pa sa sikat ng araw na si Jinggoy ang tinutukoy na may alyas na “Sexy”.

Isiniwalat ng National Bureau of Investigation (NBI) na may mga nabura sa Ben Hur Luy files, gaya ng draft letter ni “Sexy’ para kay Exe-cutive Secretay Paquito Ochoa.

Kinompirma ni Ochoa noong Biyernes na noong Hunyo 2012 ay nakatanggap siya ng liham mula kay Jinggoy na humihiling ng P250 milyon para sa livelihood projects ng mga maliliit na magsasaka sa iba’t ibang lalawigan, at inendorso sa Department of Budget and Management (DBM) ngunit hindi naman pinagbigyan.

Puwes, totoo pala ang pahayag ni Luy na ang may alyas na “Sexy” sa pork barrel scam ay si Jinggoy, at hindi si Rochelle Ahoro na personal secretary ni PNoy, tulad nang ibinulgar ng pahayagan na pagmamay-ari ng mga Estrada.

ERAP, NAPOLES PAREHO

ANG “LEGAL STRATEGY”

HABANG dinidinig sa Sandiganbayan ang plunder case laban kay Erap ay sinibak niya ang lahat ng kanyang abogado para palabasin na may “mistrial” at hinihintay lang na magwagi ang kumpareng si FPJ sa 2004 presidential elections at mabasura ang lahat niyang kaso.

Nang matalo si FPJ, napilitan si Erap na kumuha ng mga bagong abogado, ngunit ang estratehiya nama’y durugin ang kredibilidad ng Saniganbayan at palabasin na ang paglilitis sa kanyang mga kaso ay bunsod lamang ng politika para mabigyan ng katwiran ang pagpapatalsik sa kanya sa Palasyo.

Pero wala ring nagawa ang mga abogado ni Erap sa baluktot na argumento ng kanilang kli-yente, lalo na’t nalunod sila sa santambak na ebidensiya na suportado pa ng mga testigo.

Nang humarap naman si Napoles sa Senado ay wala rin siyang kasamang sariling abogado kaya puro denial ang sagot sa Senate hearing.

At nang lumabas ang Ombudsman resolution na isasampa na ang mga kaso sa Sandiganbayan at makukulong na rin sina Jinggoy, JPE, Bong at Gigi Reyes, biglang naglaho ang amnesia ni Napoles at natandaan ang lahat ng naging mga transaksyon sa kanila at sa iba pa.

Gusto ni Napoles na hindi muna makarating sa Sandiganbayan ang mga kaso, patagalin ang imbestigasyon sa pork barrel scam hanggang mag-snowball ang Napoles list sa destabilisas-yon laban kay PNoy o kaya’y abutan na ng 2016 elections, para makalusot silang lahat sa selda.

Para sa reklamo, suhestiyon at komentaryo tumawag o mag text sa 09158227400 / Email: [email protected]

Percy Lapid

About Percy Lapid

Check Also

SM 3 day Sale FEAT

Every Deal You Shouldn’t Miss Every Day, this SM Store 3 Day Sale

SM Store, your Everyday Store, is thrilled to announce that the biggest sale of the …

Collectors Con Year 2 Funkos The Block Atrium SM North EDSA

Collectors Assemble: Collectors Con Year 2 brings Exclusive Drops, Limited-editions and Supersized Funkos

Promising the ultimate collector’s adventure in the North, Collectors Con is back at The Block …

CPP PNP NPA

Miyembro ng CPP-NPA boluntaryong sumuko sa Bulacan police

ISANG miyembro ng Communist Party of the Philippines-New People’s Army (CPP-NPA) ang boluntaryong sumuko sa …

SSS Cellphone

SSS nagbabala sa miyembro at publiko sa mga pekeng alerto sa text

BINALAAN ng Social Security System (SSS) ang mga miyembro nito at ang publiko na maging …

Arrest Posas Handcuff

  Kawatan sa coffee shop, timbog

DAHIL sa mabilis na pagresponde ng mga awtoridad ay kaagad naaresto ang isang lalaki na …

Leave a Reply

Your email address will not be published. Required fields are marked *