TUMIMBUWANG ang 42-anyos traffic supervisor na lulan ng kanyang motorsiklo nang barilin ng hindi nakilalang suspek na sakay rin ng motorsiklo sa Muntinlupa City, kahapon ng madaling araw.
Dead-on-the spot ang biktimang si Rodelio Umali, assistant supervisor ng traffic section sa Manila Toll Expressway (MATES), nakatira sa Bldg I, Sambahayan, Rawis Chesa St., Bgy. 118, Zone 9, Tondo, Maynila, sanhi ng tama ng bala sa ulo at katawan.
Ayon sa pulisya, naganap ang pamamaril sa Commerce Ave., kanto ng East Asia Drive Ave., Filinvest, Alabang, Muntinlupa, dakong 4: 30 a.m..
Sa imbestigasyon ng pulisya, minamaneho ni Umali ang kulay itim niyang motorsiklo ( 7248-TQ) sa lugar, kasunod ang isa pang motorsiklo.
Nang mapalapit sa kanya ay nagbunot ng baril ang isa sa mga sakay saka pinagbabaril ang biktima.
Mabilis tumakas ang mga suspek matapos ang pamamaril.
Narekober sa pinangyarihan ng krimen ang limang basyo ng kalibre .45 pistola.
(MANNY ALCALA)
