Kaanak ni Dionix utas sa adik

UTAS ang kaanak ng konsehal ng Maynila, habang isa pa ang sugatan nang pagbabarilin ng sinasabing adik, kamakalawa ng hapon sa Tondo, Maynila.

Patay agad ang biktimang si Jaypee Polonan y Dionisio, bouncer, 28, pamangkin ni  Councilor Ernesto Dionisio, ng District 1, ng Building 24, Unit 36, Aroma Compound, Temporary Housing,Tondo.

Naka-confine sa Jose Reyes Memorial Medical Center (JRMMC) ang isa pang biktimang tinamaan ng ligaw na bala, si  Leonardo Daculinao, estudyante, ng Building 9, Katuparan St., Vitas, Tondo.

Pinaghahanap ng mga operatiba ng Manila Police District (MPD), ang suspek na si Christopher Morales, ng Building 34, Temporary Housing,Tondo.

Nabatid kay Insp. Steve Casimiro, hepe ng MPD-Homicide Section, naganap ang insidente sa harap ng bahay ng biktima habang papasok sa kanyang trabaho dakong 3:05p.m.

Sa ulat, biglang sumulpot sa kinatatayuan ng biktima ang suspek sakay ng motorsiklo at walang sabi-sabing pinagbabaril si Polonan. (leonard basilio)