Pacquiao-Marquez V posibleng mangyari

MUKHANG hindi na matutuloy ang Pacquiao-Marquez V.

Sa huling interview kay Nacho Beristain, trainer ni Juan Manuel Marquez, tutol na siya sa paghaharap nina Pacman at Marquez sa ikalimang pagkakataon.

Dahilan ni Nacho—“merely economic” na lang ang magiging kahulugan ng labang iyon.

Sa madaling salita…PERA-PERA na lang.

Mawawala na raw ang kahalagahan ng esensiya ng kasaysayan ng laban ng dalawa.

Anak ng tipaklong.   Ang dami pang dahilan ni Nacho.   Pero bakit noong naghahabol sila ng ikaapat na paghaharap ng dalawa ay sinasabi niyang mahalaga na magkaroon ng rematch sina Pacman at Marquez dahil masyadong kontrobersiyal ang unang tatlong laban.

Tingin natin, ayaw na lang talagang lumaban ang kampo ni Nacho kay Pacquiao dahil alam nilang tsamba lang ang kanan na nagpatulog sa Pambansang Kamao.

Kaya hindi dapat sabihin ni Nacho na wala nang halaga ang ikalima pang pagtatagpo ng dalawa dahil kailangang patunayan ni Marquez na hindi lang tsamba ang panalo niya kay Pacquiao.

Kailangan pang kombinsihin nila ang kasaysayan na talaga ngang nanalo si Marquez kay Pacman.

Sabagay, aminado rin si Beristain na hindi na mauulit ni Marquez ang panalo nito via knockout dahil alam niya na magsisilbing motibasyon yon kay Pacquiao para bumawi at hindi na muling magkamali sa laban.   Kaya ingat na ingat na sila.

Sabagay, pananaw lang iyon ni Beristain.   At iba ang pananaw ni Marquez.

Alam naman natin ang karakter ng mga Mexican fighter.   Hindi mga duwag at hindi umaatras sa hamon.

Sabihin lang na “lucky punch” ang nagpatulog kay Pacquiao sa naging laban nila—aangat na agad ang tapang ni Marquez.

Sa puntong iyon ay posibleng kagatin niya ang hamon ni Pacquiao.

At ang isa pang posibleng hamon kay Marquez para harapin muli si Pacquiao ay ang pangyayaring tinalo ni Pacman si Timothy Bradley na tumalo sa kanya.

0o0

Panonoorin daw ni Floyd Mayweather ang laban nina Sergio Martinez at Miguel Cotto para sa korona ng middleweight.

Posible raw na harapin niya ang mananalo sa dalawa sa susunod niyang laban sa Setyembre.

Mukhang gumagawa na naman ng alingasngas itong si Floyd para mapag-usapan.

Parang ang hirap paniwalaan na lalabanan niya si Martinez.

Posible mangyari iyon kung si Cotto ang mananalo kay Martinez dahil tinalo na niya ito sa isang desisyon.

Pero kung mananalo si Martinez?   Malamang na marami na namang dahilan itong si Floyd.

ni Alex Cruz