3-anyos nalunod sa septic tank

BUTUAN CITY – Patay ang isang 3-anyos batang lalaki nang mahulog at malunod sa septic tank sa Brgy. Obrero sa Butuan City kamakalawa.

Ayon kay PO2 Angeles Dolesen ng Butuan City Police Station 1, dakong 6 p.m. pag-uwi ng amang si Jonahan Yongco, Sr., agad niyang hinanap ang bunsong anak na si JM Yongco.

Ipina-blotter niya ang pagkawala ng anak ngunit nang sumagi sa isip na may septic tank sa likuran ng kanilang bahay ay doon siya nagduda.

Nang kanyang siyasatin nakita niya ang lumulutang na tsinelas ng paslit.

Nang hilahin gamit ang isang kahoy ay agad lumitaw ang wala nang buhay na si JM.

Agad dinala ang biktima sa ospital ngunit idineklarang dead on arrival ng attending physician.