CAMP OLIVAS, Pampanga – Natagpuang patay at may sugat sa ulo ang isang retired US Navy at ang kanyang misis kamakalawa ng umaga sa garahe ng kanilang bahay sa Samal, Bataan.
Kinilala ang mga biktimang sina Rogelio Cortez, 75, retiradong US Navy, at Flordeliza Cortez, 66, negosyante, kapwa naninirahan sa Brgy. Sapa ng nasabing bayan.
Ayon sa ulat ni Brgy. Chairman Rolando de Silva, natagpuan ang bangkay ng mag-asawa dakong 7 a.m, kapwa may sugat sa ulo na pinaniniwalaang hinataw ng matigas na bagay.
Ayon sa mga awtoriad, dumaan ang mga suspek sa likuran ng bahay at ninakaw ang hindi pa mabatid na halaga ng pera ng mga biktima.
Ang mag-asawa lamang ang nakatira sa bahay dahil ang tatlo nilang mga anak ay nagtatrabaho sa ibang bansa.
(RAUL SUSCANO)
