PANIBAGONG set ng mga pangalan ng media personalities na sinasabing nakinabang kay Janet Lim-Napoles, ang lumutang sa lathala ng isang pahayagan mula sa salaysay ng whistleblower na si Benhur Luy.
Sa panibagong ulat, ilan sa bagong nakaladkad sa isyu sina Korina Sanchez, Mike Enriquez, Deo Macalma, Rey Pacheco at isang Mon Arroyo.
Kanya-kanyang tanggi ang mga taong isinasangkot sa isyu.
Ayon kay Enriquez, maglalabas siya ng pahayag kapag nakita na niya nang buo ang laman ng testimonya ngunit ngayon pa lang ay tinawag na niya itong matinding kalokohan.
Sa panig ni Sanchez, idiniin niyang wala siyang kinalaman sa mga regalong galing kay Napoles. Kung sino man anila ang tumanggap ng regalo ay wala na silang kinalaman doon.
Habang ang iba pang nabanggit na pangalan ay wala pang inilalabas na komento kaugnay sa isyu.
Bago pa lumabas ang pangalan ng nasabing media personalities, lumabas na sa isang pahayagan ang umano’y payola ni Napoles sa ilang press people.
Tinaguring Napoles press club, ang pagbubunyag sa nasabing mga pangalan ay pansamantalang itinago ng mamamahayag na nakakuha ng kopya mula kay Luy.
