Greek national sugatan sa saksak

SUGATAN ang isang Greek national nang saksakin ng isa sa limang suspek habang pauwi sa tinutuluyang hotel sa Ermita, Maynila, kahapon ng madaling-araw.

Kinilala ni Supt. Romeo Juan Macapaz, ng MPD Station 5, ang biktimang si Georgeous Manousaikis, 41, nanunuluyan sa Manila Executive Regency Tower sa J. Bocobo St., Ermita, habang tinutunton ng pulisya ang mga suspek.

Sa salaysay ng biktima, dakong 4:30 a.m. naglalakad siya sa  kanto ng Ma. Orosa at P. Faura streets, nang lapitan ng grupo at kaagad siyang pinagsaksak ng isa sa mga suspek saka nagsitakas.

Kahit may mga saksak sa likod, nakahingi ang biktima ng saklolo sa guwardiya ng tinutuluyang hotel, si  Alfredo Magundayad, 55, na nagdala sa kanya sa ospital.

(leonard basilio)