Chito, nag-propose na ng kasal kay Neri

NAPAKA-ROMANTIC at emosyonal ang isinagawang proposal ng band singer na si Chito Miranda, 38, sa kanyang girlfriend na si Neri Naig, 28 noong Mayo 14 na isinagawa sa isang malawak na garden.

Si Chito bale ang lahat ng nag-isip kung paano gagawin ang proposal na pinalabas na isang music video shoot na kunwaring si Neri ang artistang gaganap. “It’s a front, kasi gusto ko i-document ‘yung proposal. Ito ‘yung best way na naisip ko—music video.

“Para hindi siya magtataka kung bakit may camera crew, may set-up, may camera, may sounds, may projector. I came out with a concept na kunwari may lakad-lakad sa field ‘tapos may makikita siyang projector,” masayang pagkukuwento ni Chito.

Kitang-kita namang nasorpresa si Neri nang biglang lumitaw sa wide screen ang, “Ako na siguro ang pinakasuwerteng lalaki sa buong Cavite.” At sumali na sa eksena si Chito, lumapit papunta sa kanya, at inabutan siya ng bulaklak. Doon ay mahigpit silang nagyakapan at parehong napaiyak. May ipinakitang video pa si Chito at sabay turo sa wide screen at ipinalabas ang video presentation ng couple photos nila.

Sa dulo ng video presentation, lumabas sa widescreen ang: “Dahil mapapangasawa ko ‘yung pinakamagandang babae sa Eastwoood… Kung papayag siya?”

Doon na lumuhod si Chito sa harap ni Neri at madamdaming nag-propose ng kasal sa dalaga.

Ani Chito, “I love you very much, baby… Will you marry me, baby?”

Tugon naman ni Neri, “Of course, yes.” Pagkatapos niyon ay isinuot na ni Chito ang engagement ring kay Neri at saka sila naghalikan at nagyakapan. Mayroon ding fireworks display, kaya naman ramdam na ramdam ang kasiyahan sa dalawa.