3 patay, 13 sugatan sa bus vs truck sa Quezon

TATLO ang patay habang 13 ang sugatan sa banggaan ng pampasaherong bus at truck kahapon ng madaling-araw sa lalawigan ng Quezon.

Ayon sa Tiaong Police, ang Manila-bound Raymond bus ay bumangga sa 10-wheeler truck sa Diversion Road, Brgy. Lalig dakong 12:30 a.m.

Agad binawian ng buhay si Precious Dennise De Roma, 13-anyos, at dalawa pang biktimang hindi pa nakikila.

Isinugod ang mga sugatan sa pagamutan sa Tiaong at San Pablo City, Laguna.

Ayon kay PO2 Niño Narvaez ng Tiaong Police, tumakas ang driver ng truck makaraan ang insidente.

Habang ang bus driver na si Elizalde Ibias ay nasa kustodiya na ng pulisya.

Iniimbestigahan pa ng pulisya ang ulat na sinasabing nakatulog ang driver ng truck nang maganap ang insidente.

(BETH JULIAN)