LEGAZPI CITY – Hindi umabot nang buhay sa ospital ang magkaibigan na sakay ng motorsiklo makaraang bumangga sa isang truck sa Maharlika highway ng Brgy. Paulog, Ligao City kamakalawa.
Ang mga biktimang namatay ay kinilalang sina Marlon Pillarda y Sergio, 34, at Jason Novelo y Diaz, 28, kapwa agad binawian ng buhay sa insidente. Habang kritikal sa ospital ang isa pa nilang kasama na si Jeorge de la Cruz y Pantoja, mga residente ng Brgy. Mauraro, Guinobatan, Albay.
Sa inisyal na imbestigasyon, binabaybay ng mga biktima ang daan pabalik sa kanilang lugar nang mag-overtake ito sa isa pang sasakyan ngunit bumangga sa kasalubong na truck na minamaneho ni Gil Doctor y Kalaw, 29, ng Brgy. Cabid-an, Sorsogon City.
Hindi nasugatan ang driver ng truck ngunit halos madurog din ang sasakyan dahil sa malakas na impact ng banggaan.
Sa ngayon, nananatili sa Ligao City Police Station ang suspek habang iniimbestigahan.
(JETHRO SINOCRUZ)
