PINAWI ng Palasyo ang pangamba ng publiko na irarasyon ang tubig kapag nagsimula na ang tagtuyot o El Niño sa susunod na buwan, na tinatayang aabot ng siyam na buwan o hanggang Marso 2015.
Ayon kay Communications Secretary Herminio Coloma, Jr., ang pangunahing kailangan upang matugunan ang problema sa El Niño ay ang tamang disiplina sa paggamit ng tubig.
“Wala pa pong tinatalakay na ganyan at hindi po dapat maligalig o mangamba ang ating mga kababayan. Sa kasalukuyan po ang mahalaga ay magkaroon ng kamulatan na meron tayong kinakaharap na El Niño at dahil dito kailangan ang disiplina sa paggamit ng tubig, sa pagtitipid at wastong paggamit nito, ‘yan lang po,” sabi ni Coloma.
Aniya, batay sa pinakahuling ulat ng Department of Science and Technology (DOST), nasa kritikal na antas na ang tubig sa Angat Dam na pinanggagalingan ng hanggang 90 porsyento ng tubig sa Metro Manila at mga kalapit na lalawigan, at ginagamit din para sa irigasyon at elektrisidad.
Nitong nakaraang Enero ipinag-utos na ni Pangulong Benigno Aquino III sa buong Gabinete at sa iba’t ibang ahensya ng pamahalaan na magsagawa ng mga angkop na hakbang para mapaghandaan at matugunan ang epekto ng El Niño at iba pang manipestasyon ng pagbabago ng klima.
“Ang climate change mitigation and adaptation ay isa sa mga prayoridad na programa sa Philippine Development Plan,” ani Coloma. (ROSE NOVENARIO)