Karibal sa tong tinarakan

PATAY ang isang lalaki nang tadtarin ng saksak ng kanyang karibal sa ‘tong’ sa padyak drivers sa tapat ng isang KTV bar sa Navotas City, kahapon ng madaling araw.

Dead on the spot ang biktimang kinilalang  alyas Baho, 40-anyos, ng Brgy. North Bay Boulevard South sanhi ng mga saksak sa iba’t ibang parte ng katawan.

Agad naaresto ang suspek na si  Joma Sta. Maria, 37-anyos, ng 19 M. Aquino St., Brgy. Niugan, Malabon City na nahaharap sa kasong murder.

Sa ulat nina PO2 Exequiel Sangco at PO3 Allan Ogatia, kapwa may hawak ng kaso, dakong 1:30 a.m. nang maganap ang krimen sa tapat ng Baron KTV Bar sa nasabing barangay.

Naglalakad ang biktima nang makasalubong ang suspek na agad siyang hinalihaw ng saksak at hindi na nakapanlaban.

Nabatid na matagal nang may alitan ang biktima at suspek dahil gustong angkinin ni alyas Baho ang ‘lagay’ ng mga padyak driver na pumapasok sa Navotas Fish Port Complex (NFPC) ng lungsod.

(ROMMEL SALES)