HATAW! D'yaryo ng Bayan hatawtabloid.com
KAPWA patay ang mag-asawa habang kritikal sa pagamutan ang 12-anyos nilang anak makaraang pagtatagain ng pinagbintangan nilang magnanakaw ng manok sa Tanay, Rizal kamakalawa ng madaling-araw.
Kinilala ng Rizal PNP ang mag-asawang napatay na sina Babylyn Valencia, 42, at Fedelino Valencia, 50, habang kritikal ang anak nilang si Jayme Valencia, pawang ng Sitio Rawang, Brgy. Tandang Kutyo sa bayan ng Tanay.
Ang suspek na si Henry Barcelona, Jr., 21, kapitbahay ng mga biktima, ay agad naaresto sa follow-up operation ng mga pulis sa pangunguna ni Chief Insp. Reynaldo Francisco.
Ayon sa imbestigasyon ni PO2 Mark Anthony Lopez, dakong 3 a.m. nang pasukin ng suspek sa bahay ang natutulog na mga biktima at pinagtataga sa iba’t ibang bahagi ng kanilang katawan.
Bagama’t kritikal ang kalagayan, naibulong ni Jayme sa mga pulis na si Barcelona ang umatake sa kanila.
Nabatid sa imbestigasyon, nagtanim ng galit ang suspek nang pagbintangan ng pamilya na siya ang nagnakaw ng mga alagang manok ng mga biktima.
Nakapiit ang suspek sa detention cell ng pulisya at nakatakdang sampahan ng kasong double murder at frustrated murder. (ED MORENO/
MIKKO BAYLON)
