PAGKATAPOS ng PBA All-Star Weekend, balik-aksyon ang PBA Commissioner’s Cup bukas sa Smart Araneta Coliseum.
Maghaharap ang San Mig Super Coffee at Air21 sa unang laro sa alas-5:45 ng hapon kung saan sisikapin ng Coffee Mixers na putulin ang kanilang dalawang sunod na pagkatalo.
May 3-2 panalo-talo ang tropa ni coach Tim Cone samantalang hawak ng Express ang 3-3 na kartada katabla ang Rain or Shine.
Nanalo ng tatlong sunod ang San Mig sa pagsisimula ng torneo ngunit dalawang beses nitong nasilat kontra Barako Bull at Talk ‘n Text.
Sa ikalawang laro sa alas-8 ng gabi ay tatangkain ng Tropang Texters na mapanatili ang malinis nitong karta sa labanan nito kontra Elasto Painters.
Wala pang talo sa loob ng pitong laro ang mga bata ni coach Norman Black na sigurado nang hawak ang top seed sa quarterfinals na kasama ang twice-to-beat advantage. (JAMES TY III)
