KASONG robbery with homicide ang isinampang kaso kahapon sa Makati City Prosecutor’s Office ng Makati City Police laban sa master cutter na nagnakaw at pumaslang sa isang fashion designer.
Ikinulong na sa Makati police station ang suspek na si Rogelio Aquiat, residente sa Caloocan City.
Sa follow-up operation ng Makati City Police, naaresto si Aquiat nang makita sa CCTV camera na nakapag-withdraw siya ng pera gamit ang ATM card ng biktimang si Kenneth Chua.
Si Chua, fashion designer ng ilang beauty queen at ilang talent ng ABS-CBN, ay natagpuan duguan at walang buhay sa loob ng kanyang apartment sa
Dayap St., sa Barangay Palanan, nitong Martes.
Sa pulisya, sinabi ng suspek wala siyang planong patayin si Chua ngunit nanlaban kaya’t napilitan siyang ituluyan ang biktima.
Napag-alaman na bagong trabahador lamang si Aquiat bilang master cutter ni Chua.
Tinutugis ng mga awtoridad ang isa pang suspek na kinilala lamang sa alyas Adiang.
(JAJA GARCIA)
