LEGAZPI CITY – Wala nang buhay nang matagpuan ang isang lalaki habang nakabitin sa puno ng ipil-ipil sa lungsod ng Tabaco.
Kinilala ang biktimang si Rommel Bizen, residente ng Purok 3, Brgy. Sto. Cristo, nasabing lungsod.
Dakong 8 a.m. nang matagpuan kahapon ang bangkay ni Bizen na nakabitin gamit ang straw sa puno. Inaalam pa ng mga awtoridad kung may foul play sa insidente habang hindi inaalis ang posibilidad na suicide ang nangyari.
Sa kabila nito, naniniwala si Barangay Captain Roderick Martires na nagpakamatay ang biktima dahil nagtangka na siyang magbigti kamakalawa ng gabi ngunit napigilan ng kanyang mga kapamilya.
Sa impormasyon, pumunta ang biktima sa Tabaco City Police Station at sinabing ginahasa niya ang kanyang ina.
Ngunit hindi siya pinansin ng mga pulis at pinauwi na lamang sa kanilang bahay dahil wala naman anilang nagrereklamo laban sa kanya.
Napag-alaman, noong nakaraang Sabado inilibing ang ina ng biktima nang mamatay dahil sa atake sa puso.
(BETH JULIAN)
