CAMP OLIVAS, Pampanga – Nasagip ng mga awtoridad ang limang dalagitang hinihinalang sex slaves habang tatlong tulak ng shabu ang nadakip sa drug-bust operation ng mga awtoridad sa isang farm na pinaniniwalaang drug den sa Floridablanca, Pampanga.
Ayon sa ulat ni Supt. Jhoanna Ponseca ng Floridablanca Police, nakatakda nilang ilipat ang limang dalagita sa pangangalaga ng Municipal Social Welfare Development Office (MSWDO) habang nakadetine naman ang tatlong miyembro ng sindikato na sina Mark Anthony Baul, Heinz Santos, at Mark Diamco, pawang galamay ng Santos gang na distributor ng illegal drugs sa 2nd district at mga kalapit lalawigan na pinamumunuan ni Walter Santos alyas “Whisky,” nakatakas muli sa ikalawang pagkakataon sa isinagawang pagsalakay. Nasamsam ng mga pulis sa nasabing pagsalakay ang P350,000 halaga ng shabu.
Base sa imbestigasyon ng pulisya, natukoy ang farm na pinagkukutaan ng nasabing sindikato sa Brgy. Benedicto ng nabanggit na lugar makaraang masakote ang isa sa mga lider ng grupo at pito pa sa buy-bust operation.
(RAUL SUSCANO)
