Tatay, 2 anak minasaker sa Bulacan (Bunso nakaligtas)
PATAY ang isang ama at kanyang dalawa anak nang pagbabarilin ng hindi nakilalang mga suspek habang natutulog sa loob ng kanilang bahay sa Purok 9, Brgy. Sta. Monica, Hagonoy, Bulacan kamakalawa ng gabi.
Kinilala ng pulisya ang mga napatay na sina Andres Vengco, 46, tricycle driver; Michael Vengco, 24, supervisor sa isang kompanya ng biskwit, at Mary Rose Vengco, 15, estudyante.
Himalang nakaligtas sa pamamaril ang isa pang anak ni Andres na si John Lloyd Vengco, 4-anyos, sinasabing katabi ng ama sa kanyang pag-tulog.
Lumitaw sa imbestigasyon ng pulisya, dakong 11:50 p.m. nang mangyari ang pamamaril sa mga biktima na inakala ng mga kapitbahay na mga paputok lamang.
Wala pang maibigay na detalye ang pulisya kaugnay sa posibleng motibo ng pagpaslang sa mga biktima.
ni DAISY MEDINA
