BUMAGSAK sa kamay ng mga awtoridad ang dalawang lalaki na bigtime pusher, matapos mahulihan ng limang kilo ng shabu sa buy-bust operation kamakalawa sa Quezon City.
Kinilala ang mga suspek na sina Harold Wilford, 34, may-asawa, walang trabaho at Arnel Ignacio, 49, pawang residente ng Luna-2, St. San Agustin Village, Malabon City.
Ayon kay Police Chief/Insp. Robert Razon, hepe ng Quezon City Police District-District Anti-Illegal Drugs (QCPD-DAID), naganap ang operasyon bandang 6:30 ng gabi sa Banawe St., malapit sa kanto ng Macopa St., Brgy. Sto. Domingo, Quezon City.
Tinatayang nasa P30 milyon halaga ang nasamsam na shabu mula sa dalawang suspek.
Nabatid na sakay ng kanyang Nissan Terrano (CMV-593) na itim, iniabot ni Wilford sa mga ope-ratiba ang 1 kilo ng shabu kung kaya’t dito na siya pinosasan.
Samantala, kasabay na hinuli rin nang oras na iyon si Ignacio na sakay naman ng isang Mazda Familia (UTN-234) na asul, na nahulihan naman ng apat kilong shabu.
(JETHRO SINOCRUZ)
