HATAW! D'yaryo ng Bayan hatawtabloid.com
KINOMPISKA ng mga operatiba ng Optical Media Board (OMB) ang mahigit 13,000 nagamit na at ini-recycle na laptop at desktop computer mula sa mga bansang China, Korea at Japan sa isang bodega sa bayan ng Marilao, sa lalawigan ng Bulacan, kamakalawa.
Ayon kay OMB Chairman Christian Natividad, inire-recycle ang mga nagamit nang branded desktop computers saka ibinebenta bilang ‘brand-new items’ sa mga gadget stores sa Metro Manila.
Dagdag ni Natividad, kinabitan ng counterfeit operating systems ang mga nakompiskang computers na tinatayang nagkakahalaga ng P200 milyon.
Nadakip sa naturang operasyon ang walong Chinese nationals at isang Filipino IT expert na sinasabing nagpapatakbo ng bodega sa 3M Compound sa Barangay Sta. Rosa, sa nabanggit na bayan Marilao.
Kasunod nito, pinaalalahanan ni Natividad ang publiko, higit ang mga naghahanap ng mga gadget para sa online classes, laban sa pagbili ng mga recycled computer mula sa mga tindahan o puwesto na hindi lisensiyado ng OMB.
Nakasaad sa Republic Act No. 9239 o ang Optical Media Act of 2003, na binigyan ang OMB ng awtoridad na suriin ang mga kagamitan o gadgets na nakagagawa o kayang komopya ng optical media bilang bahagi ng kanilang misyon na masawata ang counterfeiting. (MICKA BAUTISTA)
