Ping namamalimos ng pambayad sa condo

KITANG-KITA KO
ni Danny Vibas

MARAMI sa showbiz ang naghihikahos at nangangailangan ng pagkakakitaan sa panahon ng pandemya.

Balita ng katoto sa panulat na si Gorgy Rula ng PEP Troika na ilang kaibigan sa showbiz ang naka-chat n’ya at napag-usapan nila ang indie actor na si Ping Medina, na  namamalimos sa Instagram niya para mabayaran ang kanyang renta sa condo pagpasok ng buwan ng Agosto.

Nabanggit ni Ping ang pinasok niyang online sabong na ang dami na rin palang naloko. May ilang nasirang pagkakaibigan dahil sa natatakbuhang pera gawa nitong online sabong.

Panawagan ng katotong Gorgy, dahil sa Instagram post ni Ping, sana’y maawa sa kanya ang ilang TV executives at kunin siyang maging regular sa isang drama series.

Sa mga artista, itong regular show sa TV na lang ang puwede nilang asahan para mabuhay nang medyo maginhawa sa panahon ng pandemya. Ang karamihan, umaasa na lang sa kanilang YouTube channel, pero iba rin talaga ‘pag may regular TV show online sila.