This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
Nagsimula na namang gumawa ng raket ang ilang tulisan ‘este’ operatiba ng PNP Quezon City Police District (QCPD) sa pamamagitan ng pambubulabog (shakedown?!) sa ilang establisyemento sa lungsod.
At ito ay dahil sa ‘utak’ ng isang dating Kawatan ‘este’ KAGAWAD na ngayon ay police asset na siyang taga-nguso sa mga iha-harass na negosyo para pagkunan ng kotong o pamasko.
Tandem daw nito ang isang pulis na alias ‘KAWALI?!’
Kinilala ng mga negosyante ang isang alias JUNE TULO y PULO, ang naturang point man (tsuwariwap) sa ilang operatiba ng QPCD.
Hayagan din ipinangangalandakan na siya raw ang itinalagang kolektor ni QCPD Director Gen. Edgar Tinio para sa iba’t ibang unit ng command gaya ng Special Operation Group na pinamumunuan ni Col. Jay Agcaoili.
“LAGUM” (salitang ginagamit para sa kalahatan) ang palaging dialogue nitong si alias Tulo y Pulo sa pangongolektong ng ‘protection money’ na pihado raw makararating at makatutulong sa bawat opisina ng mga operational unit ng QCPD gaya ng opisina ni Tinio at Agcaoili.
Totoo ba ‘yan mga bossing!?
Umaabot mula dalawang libong piso (P2,000) hanggang anim na libo (P6,000) kada linggo ang pilit na itinatara ni Tulo y Pulo sa kada establisyemento na makakausap, masisindak o maloloko nito gamit ang pangalan ng QCPD.
Kung hindi sasang-ayon kay alias Tulo ‘y Pulo ang isang negosyante, mga ilang araw lang ay susugod siya kasama ang iba’t ibang operatiba ng QCPD, Special Operation Group at QC Health Department para magsagawa ng inspection ‘kuno’ kung lehitimo ang business at ang kasunod ay makipagnegosasyon para sa protection money.
Sonabagan!!!
Gen. Edgar Tinio, matanong ko lang ho sa inyo, ito bang tarantadong si Tulo ‘y Pulo ay binasbasan n’yo para mangolektong sa inyong mga pulis!?
Aba’y kung hindi ‘e tagpasin mo na agad ang sungay bago ka pa maikanal niyan!
[divider]
Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
Nagsimula na namang gumawa ng raket ang ilang tulisan ‘este’ operatiba ng PNP Quezon City Police District (QCPD) sa pamamagitan ng pambubulabog (shakedown?!) sa ilang establisyemento sa lungsod.
