Multi-sectoral convention on road traffic ang kailangan

KAHAPON opisyal na lumarga sa Epifanio Delos Santos Avenue (EDSA) ang mga kagawad ng PNP Highway Patrol Group (HPG) para magmando ng trapiko ng mga sasakyan.

Majority ng mga motorista ay nagsabing mayroon namang naging pagbabago at nakaranas naman sila ng kaunting kaluwagan sa pagbibiyahe lalo na sa rush hour.

Pero hindi pa rin nawala ang mahabang pila ng sasakyan na umuusad sa EDSA.

Ibig sabihin bumper to bumper pa rin ang mga sasakyan pero umuusad nang mas mabilis kaysa dati.

Ibig sabihin kung dati ‘e umuusad sila ng 20 kph, baka kahapon ay 40 kph o baka meron pang nakapag-60 kph.

Sa mga pangunahing kalsada na walang itinalagang PNP-HPG, gaya sa Macapagal Blvd. Pasay-Parañaque, as usual, sumasakit pa rin ang ulo ng commuters at motorista.

Ang nagkakaisang feedbacak nga ‘e, maaga silang umalis  sa kani-kanilang bahay pero late pa rin nang makarating sa opisina.

In short, marami pa ring nabuwisit kaysa natuwa.

Kung seseryosohing resolbahin, palagay natin ‘e pwede nang pag-isipan ng DoTC ang mga pag-aaral na ito para makapaglunsad ng isang “multi-sectoral convention on road traffic” na ang magiging vision ay “all time stress-free travel in Metro areas roads.”

Wow! Heaven ‘yan kapag na-achieve ang ganyang vision.

Pero alam nating hindi pa ang pagtatalaga sa PNP-HPG ang lubos na solusyon. Ito ay masasabing bahagi pa rin ng eksperimento at pag-aaral na hindi natin alam kung makatutulong talaga para lutasin ang hindi maayos na trapiko ng mga sasakyan sa Metro Manila.

Ganoon pa man, naniniwala tayo na mareresolba ito, kung matutumbok ang tamang solusyon.

Dapat lang sigurong maintindihan ng mga traffic expert natin na magkakarugtong ang mga kalsada sa Metro Manila at mayroong katuturan kung bakit ito magkakarugtong.

Dapat din nilang maunawaan na ang paghugos ng mga tao sa mga pangunahing lansangan sa Metro Manila mula sa airport, sa pier at maging sa mga paaralan, industrial area, at commercial centers ay karugtong ng pagreresolba para maisaayos ang trapiko ng mga sasakyan sa bansa.

Pansinin din ang commuters na nakapila sa MRT at LRT.

May katuturan din ang polisiya na kung walang garahe, hindi dapat payagan bumili ng sasak-yan.

May rason din ang sukat ng mga kalsada, kung bakit may secondary roads, at kung bakit kaila-ngan na mayroong pedestrian, motorcycle at bicycle lane.

Pansinin ninyo na lahat ‘yan ay hindi maayos ang pagkakadisenyo sa ating mga lansangan.

Ibig sabihin, ang traffic jam sa ating bansa ay posibleng nag-uumpisa sa maling paggamit ng kalsada.

Ang classic example rito, pinatay ang kalsada para gawing parking area. Binarahan ang kalsada para latagan ng mga paninda ng ambulant vendors.

Isinara ang kalsada kasi residential area daw.

Inuulit po natin, pansinin nating lahat, at doon ay mapagtatanto natin na mula sa ating bahay, sa komunidad na ating kinabibilangan ay sinisimulan natin ang isang aktibidad na posibleng pinagmumulan ng traffic jam.

Hindi pa kasama riyan ‘yung pagpapahalaga natin sa paggamit ng oras.

Hindi natin inaabsuwelto ang gobyerno sa problema ng malalang trapiko sa Metro areas.

Ang sinasabi natin, pag-isipan natin na buuin ang isang “multi-sectoral convention on road traffic” para makuha ang kabuuang datos na eventually ay magagamit sa pagresolba nito, sa pagbubuo ng mga patakaran na maaaring suhayan, pagtibayin at bigyan ng pangil ng lehislatura na eventually ay magluluwal sa isang “all time stress-free travel in Metro areas roads.”

Paging DoTC Secretary Joseph Emilio Pabaya ‘este’ Abaya!

Ang suwerte-suwerte mo dahil libreng-libre ang advice na ito.

Alam natin na mas maraming henyo riyan sa DoTC pero ang ipinagtataka natin ‘e kung bakit ayaw nilang magpursige nang ganitong klase ng mga aktibidad para sa ikareresolba ng isang malaking ‘teknikal’ na problema sa bansa.

Paging PNOY ADMIN!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com