James nilista ang 2-1 para sa Cavs

TUMIKADA si basketball superstar LeBron James ng 40 puntos para angklahang muli ang Cleveland Cavaliers sa 96-91 panalo kontra Golden State Warriors sa Game 3 Finals ng 2014-15 National Basketball Association (NBA) kahapon.

Kinulang ng dalawang assists si James para isukbit ang pangalawang triple-double performance ngayong Finals sa kanilang best-of-seven series.

May nahablot na 12 rebounds si four-time NBA MVP James at may kasama pang apat na steals at dalawang blocks kaya naman angat na sila ng 2-1 sa serye.

Bumakas din si point guard Matthew Dellavedova ng 20 points, limang rebounds at apat na assists habang may tig 10 puntos sina Tristan Thompson at J.R. Smith para sa Cavaliers.

Umabot sa 20 puntos ang inabante ng Cavaliers sa third canto subalit naibaba ito ng Warriors sa isang puntos, 81-80 may 2:45 minuto na lang sa fourth period matapos isalpak ni Stephen Curry ang three-point shot mula sa assist ni Draymond Green.

Sumagot naman agad ng pabandang tira si Dellavedova at may kasama pang foul para ilista ang 83-80 matapos ipasok ang bonus free throw.

Nagsumite si Curry ng 27 markers at six rebounds at assists para sa Golden State habang tumulong din sa opensa sina Andre Iguodala at Klay Thompson ng 15 at 14 puntos ayon sa pagkakasunod.

Samantala, sa Cleveland pa rin ilalaro ang Game 4 at pagkatapos ay babalik sa Golden State para sa Game 5.

ni ARABELA PRINCESS DAWA