Panaginip mo, Interpret ko: Napanaginipan ang ex

Dear Señor,

Paki intepret po sana, nagtataka kasi ako dahil napanaginip ko ‘yung ex ko e pareho nman kaming may asawa na, just kol me Uge from Malabon, thank u po sir… pls don’t post my cp#

Dear Uge,

Base sa iyong panaginip, ito ay posibleng may kaugnayan o babala na ang dating kabiguan at sakit na sinapit o naranasan sa piling ng ex mo ay maaaring mangyari ulit ngayon. Ang anumang natutunan sa iyong pakikipagrelasyon sa kanya ay dapat mong i-apply sa iyong asawa upang hindi na maulit ang kabiguang naranasan dati. Dapat mong ma-satisfy ang iyong emotional needs at ang inner turmoil ay maresolba. Maaari rin namang kaya sumagi siya sa panaginip mo ay dahil sa mga bagay na nagsilbing trigger kaya mo siya napanaginipan. Ang mga halimbawa nito ay ang makita mo ang dating larawan ng iyong ex, regalong galing sa kanya, mga dating kaibigan o kakilala ninyo, ang mapagawi ka sa lugar na madalas ninyong puntahan noon, ang marinig ang dating themesong ninyo at mga katulad na sitwasyon o halimbawa. Kung ganito ang sitwasyon, walang dapat ipag-alala dahil iyon ang rason kaya mo siya napanaginipan. Posible rin namang may mga sitwasyon noon sa inyo ng ex mo ang gusto mong mangyari sa inyo ng asawa mo ngayon, kaya siya pumapasok sa isipan mo. Kumbaga, nagkakaroon ng comparison sa ex mo at sa iyong asawa ngayon, kaya siya lumalabas sa iyong bungang-tulog. Maaari rin na hindi ka masaya o satisfy sa inyong relasyon ng asawa mo, kaya pumapasok sa iyong sub-conscious ang dating karelasyon kahit hindi mo ito talaga gusto, at lumalabas nga siya sa iyong panaginip. Subalit kung wala naman ang mga elementong ito at mahal mo naman ang iyong asawa, huwag mo nang isipin ang panaginip mong ito dahil maaaring ito ay nagkataon lamang bunsod ng ilang mga elemento o bagay na wala kang kontrol, subalit wala naman talagang direktang significance sa iyo ang napanaginipan mo.

Señor H.