Kelot nag-amok sa bad haircut

INARESTO ng US police ang isang lalaki na nagwasak ng hairdressing salon dahil hindi nagustuhan ang gupit sa kanyang buhok.

Ayon sa mga pulis, hindi nagustuhan ni Alan Becker, 47, ang pagkakagupit sa kanyang buhok sa Loft Salon and Spa sa Stamford, Connecticut.

At napikon siya nang singilin siya ng $50 (£32) para sa nasabing istilo ng gupit, ayon sa ulat ng local WFSB TV station.

Nagsimulang ihagis ni Becker ang mga gamit sa hairdressing salon nang mabatid kung magkano ang halaga ng gupit sa kanya.

Pinagtatadyakan din ni Becker ang dingding at pinagsalitaan ng masama ang mga empleyado at kustomer, ayon sa mga pulis.

Pagkaraan ay umalis si Becker ngunit makalipas ang ilang minuto ay bumalik at iginiit sa stylist na ayusin ang kanyang buhok.

Tumanggi ang stylist at tumawag sa himpilan ng pulisya na nagresulta sa pagkakaaresto kay Becker sa kanyang bahay.

Siya ay kinasuhan ng ‘breach of the peace and criminal mischief’. (ORANGE QUIRKY NEWS)