All-out offensive vs BIFF inilunsad ng AFP

NAGLUNSAD na ng all-out offensive ang Armed Forces of the Philippines (AFP) kontra sa Bangsamoro Islamic Freedom Fighters (BIFF).

Kinompirma ni Lt. Col. Harold Cabunoc, hepe ng Public Information Office (PIO) ng AFP, iniutos ito ni Gen. Gregorio Pio Catapang, chief of staff ng AFP, sa Western Mindanao Command (WestMinCom)

“It had already started a few days ago after the BIFF attacked innocent civilians in (Barangay) Kabasalan and also nearby villages,” ani Cabunoc.

Paliwanag ni Cabunoc, kapag all-out offensive ay highly mobile sila at patuloy ang operasyon laban sa rebeldeng grupo habang pinoprotektahan ang apektadong mga komunidad.

“Right now, our forces are also coordinating with different local government officials to protect the displaced persons who are now taking shelter in evacuation centers in Pagalungan town also in Pikit town.”

Batay sa pinakahuling report na nakuha nito, apektado ang nasa 20,000 hanggang 25,000 indibidwal dahil sa mga atake ng BIFF.

Inutusan na rin aniya ni Catapang ang mga unit commander na suportahan ang Department of Social Welfare and Development (DSWD) at mga lokal na pamahalaan para sa humanitarian assistance.

Ngunit giit ni Cabunoc na “this has nothing to do with Mamasapano.”

Ikinanlong ng BIFF si Usman — AFP

NAKATANGGAP ng impormasyon ang Armed Forces of the Philippines (AFP) na kinanlong ng Bangsamoro Islamic Freedom Fighters (BIFF) ang international terrorist na si Basit Usman.

“We have received information that [Usman] was coddled by the BIFF before,” ani Lt. Col. Harold Cabunoc ng Public Information Office (PIO).

Ngunit hindi aniya ito nangangahulugang hanggang ngayon ay nasa BIFF pa rin si Usman.

Ayon kay Cabunoc, ang paglulunsad nila ng all-out offensive sa BIFF ay hindi partikular na kaugnay sa target na terorista.

Patuloy ang paghahanap ng militar at PNP sa terorista.

“The BIFF had been coddling Usman for many months now and we are calling on the people to help us locate Basit Usman’s cohorts and also in locating these BIFF members who are continuously using armed violence to attack innocent civilians and communities.”