Bukayo ka na Ret. Gen. Franklin Bucayo

ANO ba talaga ang trabaho ni retired Gen. Franklin Bucayo bilang director sa Bureau of Corrections (BuCor)?

Sa mga sunod-sunod na kaguluhan at eskandalo ngayon sa National Bilibid Prison (NBP) ni wala tayong naririnig na reaksiyon at aksiyon mula mismo kay ret. Gen. Bucayo o kahit man lang mula sa initiative ng kung sino man sa kanyang tanggapan.

Ang pinakamatindi, tila inaamin ni ret. Gen. Bucayo na ‘helpless’ siya sa tila institutionalized na korupsiyon at terorismo sa loob ng Bilibid na kagagawan ng malalaking drug lord.

Hindi ba naiintindihan ni ret. Gen. Bucayo na madaling imanipula ng drug money ang mga bilanggo d’yan sa Bilibid, dahil unang-una sila pa rin ang inaasahan ng kanilang pamilya kahit nakakulong sila.

Ang ipinagtataka naman natin, bakit pinayagan ni Undersecretary Francisco Baraan III at ni Dir. Bucayo na magtambakan at maipon sa Bilibid ang malalaking Chinese drug lord d’yan?!

Magkano ‘este ano ang dahilan?!

Noong panahon ni ret. Gen. Gaudencio Pangilinan sa BuCor, pinaghiwa-hiwalay niya ang mga bigtime Chinese drug lord sa iba’t ibang penal colony.

At marami ang naniniwala na ‘yan ang dahilan kung bakit trinabahao ng sindikato si ret. Gen. Pangilinan.

Mukhang ‘kinatakutan’ naman ni ret. Gen. Bucayo na banggain ang ‘sindikato’ sa loob ng Bilibid kaya namayagpag ang mga sindikato?

Hindi nagawa ni ret. Gen. Bucayo na itapon sa Iwahig o kaya sa Davao Penal Colony ‘yang mga bigtime Chinese drug lord lalo na ‘yung mga notorious na drug lord.

Aba ‘e kung aminado si ret. Gen. Bucayo na hindi niya kaya ‘yang mga drug lord sa loob ng Bilibid … aba ‘e napakaluwag ng gate ng BuCor para lumayas na siya diyan ‘di ba…

Ano kaya gustong mangyari ni ret. Gen. Bucayo, ipagtrabaho siya ni Pangulong Noynoy at ni Secretary Leila De Lima?!

Aba ‘e kung ganyan lang din ang output ni ret. Gen. Bucayo, mas mabuting mag-RESIGN na siya!!!