3 nurse todas sa SUV ni Asistio

PATAY ang tatlong nurse na sakay ng isang auxillary utility vehicle (AUV) nang madaganan ng lumipad na sports utility vehicle (SUV) na minamaneho ng isang Asistio scion sa C-5 Ortigas Flyover sa Pasig City, kahapon ng hapon.

Kinilala ang mga namatay na nurse na pawang pasahero ng AUV na sina Lyn Pascua, Rose Ann Ocuendo at Janine Ray Manzanida.

Sugatan ang driver ng SUV, may plakang KEX 246, na si Luis Asistio III at ang driver ng AUV na isang Ryan Lester Yadao gayon din ang dalawa pang pasahero na sina Jacklyn Mae Terado at Bubbles Lapuos.

Sa imbestigasyon, nabatid na nasa southbound ang SUV (KEX 246) na minamanaeho ni Asistio nang araruhin nito ang plantbox sa center island ng flyover.

Sa lakas ng pagkakabangga, lumipad ito kaya natapyas ang bubong ng kasalubong (northbound) na AUV na minamaneho ni Yadao, kasama ang limang nurse.

Dahil dito, nawalan ng kontrol ang AUV at sumampa sa center island habang bumaligtad ang SUV ni Assistio.

Ayon kay Andy Undecimo ng Brgy. Ugong Rescue, amoy alcohol ang loob ng SUV at may nakitang bote ng alak dito.

Ed Moreno