HATAW! D'yaryo ng Bayan hatawtabloid.com
BIGO SA UNANG PAG-AABANG SI ROX PERO HINDI SIYA SUMUKO HANGGANG…
Pero hanggang sa matapos ang pagpapamasahe ni Jakol ay ‘di niya namataan man lang ang pagpasok o paglabas doon ni Daday.
“Am’bilis mo naman…” aniya sa kasamang ka-buddy.
“Nauna ka sa akin dito, e… Mas mabilis ka,” ang tawa nito.
Inihatid niya si Jakol sa pag-uwi. Sa Moriones niya ibinaba ito. Naghiwalay sila nito na masama ang loob sa pagkadesmaya. Gulong-gulo pa rin ang isip niya kung paano matatagpuan si Daday. Pero ano’t anoman ang mangyari ay hinding-hindi siya susuko sa paghahanap sa babaing pinakamamahal.
Sa minsang pakikipagkuwentuhan ni Rox sa sekyu ng sauna parlor ay napag-alaman niyang bukas nang beinte kuwatro oras ang establisimyentong iyon. Karamihan daw sa mga masahista ay stay-in doon. Bihira lang umano sa mga kababaihan niyon ang nag-uuwian.
Nang gabing iyon ay mas inagahan niya ang pagpunta sa sauna parlor. Mag-isa si-yang nagpunta roon para walang maka-gambala sa kanyang oras. Pasado ala-sais pa lang ng gabi noon. Pinostehan niya sa parking lot ng establismyento ang paghihintay kay Daday sa loob ng kanyang kotse.
Pamaya-maya ay huminto sa tapat ng entrance ng sauna parlor ang isang taksi. Nagsosolo ang babaing umibis ng sasakyan. Si Daday! Eleganteng-elegante ang kagandahan nito sa kasuotang kulay pulang bestida na pinatungan ng itim na blazer. Nagdudumali ito sa paglalakad.
“Dadayyy!” ang isinigaw niya sa bintana ng kanyang sasakyan.
Pero hindi siya narinig ni Daday. Mabilis niyang nabuksan ang pinto ng kanyang kotse at agad-agad itong hinabol. Pinigilan niya ang isang kamay nito nang abutan sa bungad ng pasukan ng gusali. (Itutuloy)
ni Rey Atalia
