Transgender inilublob sa inodoro hanggang mamatay (Nabuking ng sundalong Kano na hindi tunay na babae)

HINIHINALANG sinadyang patayin ang isang transgender ng sinabing kaulayaw niyang isang US serviceman makaraan matagpuang nakalublob ang ulo ng biktima sa ino-doro ng motel sa Olongapo City kamakalawa ng gabi.

Iniimbestigahan ng Region 3 PNP ang pagkamatay ni Jeffrey Laude, alyas Jennifer, 26, ng 5th St., Drapper West, Tapinac, ng nasabing lungsod, bali ang leeg at nakalawit ang dila nang matagpuan.

Base sa inisyal na ulat, dakong 10:55 p.m. nang mag-check-in sa Celzone Lodge ang biktima kasama ang dayuhang naka-army cut at blonde ang buhok.

Pagsapit ng 11:30 p.m. ay mag-isa na lamang lumabas ng kwarto ang dayuhan at iniwang bukas ang pintuan.

Dakong 12:05 a.m. habang naglilinis ay natagpuan ang biktima ng hotel boy kaya agad na iniulat sa himpilan ng pulisya.

Sa imbestigasyon ng mga awtoridad nabatid na nakilala ni Jennifer sa Ambyanz disco bar ang suspek at nagkasundo silang mag-motel.

Inihatid ang dalawa ng isang transgender na kinilalang si Barbie sa motel at pagdating doon ay agad pinaalis ni Jennifer upang hindi sila mabuking ng sundalo na sila ay transgender.

Hinihinalang nabistong transgender ang biktima kaya pinatay ng dayuhan.

(RAUL SUSCANO)