HATAW! D'yaryo ng Bayan hatawtabloid.com
NAGBIGTI ang isang 16-anyos binatilyo nang hindi sumipot ang kanyang dating nobya sa pagdiriwang ng kaarawan ng biktima kamakalawa ng madaling araw sa Marikina City.
Kinilala ng pulisya ang biktimang si Nolie Bruce, nakatira sa 68 Palay St., Brgy. Tumana sa naturang lungsod.
Dakong 4:30 a.m. nang natagpuan ng tiyuhin na si Abner Marcos, 34, ang pamangkin habang nakabigti sa puno ng kawayan.
Nabatid na lumabas si Marcos ng bahay para manubig ngunit tumambad sa kanya ang bangkay ng biktima kaya dali-dali niyang tinawag ang ina ng binatilyo na si Nanitte Omega at kinalas ang tali ngunit wala nang buhay si Nolie.
Hinala ng ina, ang hindi pagsipot ng kasintahan na inimbitahan ni Nolie para sa pagdiriwang ng kaarawan ang naging dahilan ng pagpapakamatay ng biktima.
(ED MORENO)
