Trike driver nabuking si misis at lover (Pasahero inihatid sa motel)

GENERAL SANTOS CITY – Ilang minuto rin naghabulan ang isang mister at ang lalaking nakasama ng kanyang misis makaraan maaktohang nag-check-in sa isang lodging house sa lungsod kamakalawa.

Hindi naabutan ng mister na si Jimmy Quiamco, 42, tricycle driver, ang suspek kaya binalikan na lamang niya ang asawa na si Maribel na humantong sa mainitang pagtatalo.

Sinumbatan pa ni Maribel si Jimmy na sinusundan sa kanyang ginagawa gayong pinabayaan ang kanyang responsibilidad bilang asawa kaya’t naghanap na lamang ng ibang makakasama.

Una rito, nagkataong may inihatid na pasahero si Jimmy sa lodging house nang makita niya ang motor ng asawa na nakaparada sa tapat ng isang pinto sa nasabing lodging house.

Agad tumawag sa himpilan ng pulisya si Jimmy para magresponde ngunit hindi pa man nakararating ang mga pulis ay lumabas na si Maribel at ang kanyang lalaki.

Sinasabing may ‘nangyari’ kina Maribel at sa lalaking kanyang nakasama.

Napag-alaman, ang mag-asawa ay may dalawang anak na 16-anyos at 11-anyos.