Utak sa Enzo Pastor slay, may kaso pa

INIUTOS ng Department of Justice ang pagsasampa ng kasong illegal possession of firearms laban sa itinuturong mastermind ng pagpatay kay international race champion Enzo Pastor na si Domingo “Sandy” De Guzman.

Maalala, idinaan sa hiwalay na inquest proceeding si De Guzman para sa naturang kaso makaraan mahulihan ng caliber .45 pistol sa entrapment operation.

Si De Guzman ang sinasabing nagbayad ng P100,000 sa self-confessed gunner na si PO2 Edgar Angel upang patayin si Pastor.

Nang mahuli ay nakatakda sanang ibigay ni De Guzman ang P50,000 bonus kay Angel.

Sina De Guzman at Angel ay una nang sinampahan ng kasong murder at frustrated murder.

Love triangle ang nakikitang motibo sa krimen makaraan mapag-alamang may extra marital affair si De Guzman sa misis ni Enzo na si Dahlia Pastor na pinaghahanap na ngayon makaraan sampahan ng kasong parricide at frustrated murder.