Jailbreak sa Zambo (4 patay, 9 sugatan)

Tatlong preso, isang jail guard ang patay habang sugatan ang siyam iba pa sa naganap na jailbreak sa Zamboanga del Norte Provincial Jail sa Siocon, ng nasabing lalawigan.

Kinilala ng Bureau of Jail Management and Penology (BJMP) ang tatlo sa apat na namatay na sina JO1 Ryanbel Bagun, jail guard na nakatalaga sa nabanggit na piitan; magkapatid na inmates na sina Ruel Humoc at Preciouso Humoc, at isang preso na hindi pa kinilala.

Ginagamot sa ospital ang mga sugatan na sina P03 Romel Jay Hachuela at P01 Paul Tombic; dalawang jail guards na sina J02 Roldan Felizarta at Patrick Galvez; apat na inmates na sina Reneboy Humoc, Lito Magsayo, Ryllmark Canonio at Zenaid Insu.

Sa ulat ng BJMP, bandang 7:45 p.m. nang mangyari ang insidente sa nasabing piitan sa Barangay Poblacion, Siocon, Zamboanga del Norte, matapos mabisto ang tangkang pagtakas ng hindi matukoy na bilang ng mga preso na humantong sa shootout.

Sa isinagawang joint operation ng Philippine National Police (PNP), BJMP at mga sundalo, naaresto at muling naibalik sa kulungan ang lahat ng mga tumakas na preso.

Iniimbestigahan ng pulisya ang pamunuan ng BJMP sa nasabing insidente.

ni BETH JULIAN