HATAW! D'yaryo ng Bayan hatawtabloid.com
SUSPENDIDO pa rin ang head coach ng UP Maroons na si Rey Madrid para sa laro nila kontra Adamson University sa UAAP Season 77 men’s basketball mamaya sa Mall of Asia Arena sa Pasay.
Ayon kay UAAP Commissioner Andy Jao, hindi niya tinanggap ang apela ng Maroons na bawasan ang suspensiyon ni Madrid .
Sinuspinde ni Jao si Madrid dahil sa mga komento ng huli tungkol sa umano’y point-shaving sa UAAP na ayon kay Jao ay nakakasisira sa integridad ng liga.
Bukod dito, sinabi rin ni Jao na hindi nagbigay si Madrid ng ebidensiya tungkol sa point-shaving at mataas pa rin ang kompiyansa ng dating PBA sportscaster sa mga reperi ng UAAP.
Wala pang panalo ang UP pagkatapos ng anim na laro ngayong UAAP season samantalang limang beses na nasilat ang Falcons.
Si Ramil Cruz pa rin ang hahawak sa UP sa laro nito kontra Adamson pagkatapos na matalo ang Maroons kontra De La Salle, 74-53, noong Miyerkoles. (James Ty III)
