Mag-utol, pinsan nalunod sa ilog

NAGA CITY – Nauwi sa trahedya ang sana’y masayang pagkikitakita ng magkakapamilya sa Tinambac, Camarines Sur.

Ito’y makaraan malunod sa Himoragat River ang magkapatid na sina Abegail Alillano, 18, at Alvin Alillano, 10, at ang kanilang pinsan na si Jaslyn Alillano, 20.

Ayon kay PO3 Rizalino Pante, nabatid na galing sa bayan ng Goa ang mga biktima kasama ang kanilang iba pang kapamilya at nagtungo sa lugar para bisitahin ang kanilang tiyuhin.

Pansamantalang iniwan ng mga nakatatanda sa pamilya ang tatlo upang bumili ng pagkain nang magkayayaan silang maligo sa ilog.

Dahil hindi pamilyar sa lugar, nakarating sa malalim na bahagi ng ilog ang mga biktima hanggang tangayin ng malakas na agos ng tubig.

Nang maiahon, isinugod sa pagamutan ang mga biktima ngunit idineklarang dead on arrival.

Napag-alaman na hindi marunong lumangoy ang mga biktima. (BETH JULIAN)