‘Vendor’ nilikida sa 5/6

BINARIL at napatay ang isang padre de pamilya ng hindi nakilalang suspek habang naglalakad kasama ang misis at anak, sa Makati City kamakalawa ng gabi.

Hinihinalang may kaugnayan sa pautang na 5-6 ang motibo para patayin ang biktimang si Jesus Beronio, nasa hustong gulang, vendor, ng Barangay Guadalupe Nuevo.

Iinaalam ng pulisya ang pagkakakilanlan ng suspek na mabilis nakatakas. Nagsasagawa ng follow-up ang pulisya kaugnay sa pamamaslang.

Sa imbestigasyon ni PO3 Ronald Villaranda, ng Station Investigation and Detective Management Section, (SIDMS), naganap ang insidente sa Magsaysay Ave., Barangay Guadalupe Nuevo, dakong 8:00 ng gabi.

Sa ulat, naglalakad ang biktima kasama ang misis niyang si Jenifer, karga ang kanilang anak, nang sumulpot ang suspek na bumaril sa kanyang ulo.

Ayon sa misis ng biktima, noong nakaraang linggo ay  nakatanggap ng death threat ang kanyang mister dahil sa utang na 5-6. (JAJA GARCIA)