Kapalaran ni Erap nasa kamay ng SC-Dirty Harry
IPINAUUBAYA na ni dating Manila Mayor Alfredo Lim sa Korte Suprema ang kapalaran ni dating pangulo at ngayon Manila Mayor Joseph Ejercito Estrada.
Sakay ng taxi, naka-dilaw na t-shirt, walang bodyguard nang dumating si Mayor Lim sa lingguhang “Tapatan sa Aristocrat Forum” sa Malate, Maynila, kamakalawa.
Tumangging magpalawig si Lim nang tanungin hinggil sa disqualification case laban kay Estrada.
“Bahala na ang Supreme Court sa kanya,” nakangiting tugon ng alkalde na tinaguriang ‘Dirty Harry.’
Nang tanungin si Lim kung papayag siyang tapusin ang termino ni Estrada sakaling idiskuwalipika ng SC, umiling ang butihing mayor.
“Huwag na ‘yan. Antayin muna natin na magsalita ang Supreme Court,” ayon sa dating alkalde na maaliwalas ang mukha. (leonard basilio)
