Gang leader sa Isabela todas sa ambush

CAUAYAN CITY, Isabela – Patay makaraan barilin nang maraming beses dakong 6 p.m. kamakalawa ang itinuturong lider ng criminal gang sa Isabela na pangunahing kumikilos sa 3rd at 4th district ng lalawigan.

Idineklarang dead on arrival sa Manango Hospital sa Alicia, Isabela ang biktimang si Prisco “Piring” Taguba, residente ng Cumu, Angadanan, Isabela, lider ng tinaguriang Taguba group.

Sa imbestigasyon ng Angadanan Police Station, minamaneho ni Taguba ang kanyang Nissan Terrano nang harangin at paputukan ng hindi nakilalang armadong lalaki.

Ang criminal gang na sinasabing pinamumunuan ni Taguba ay sangkot sa maraming kaso ng pagnana-kaw, pagpatay at iba pang uri ng krimen sa ilang bayan sa 3rd at 4th district ng Isabela.

May mga mandamiento de aresto na ipinalabas ang korte sa mga kasong isinampa laban kay Taguba ngunit hindi siya naaresto dahil magaling magtago.

(BETH JULIAN)