HATAW! D'yaryo ng Bayan hatawtabloid.com
Kinasuhan ng organizer ng Miss Bikini Philippines pageant ang dating kandidatang si Roxanne Cabañero.
Humirit ang Slimmers World International ng P1 milyon danyos para sa paulit-ulit na pagbanggit ni Cabañero sa pangalan ng organisasyon at sa Miss Bikini Philippines sa inihaing reklamo at mga panayam kaugnay ng umano’y panggagahasa sa kanya ng aktor na si Vhong Navarro.
Nakasaad sa kasong inihain sa Makati Regional Trial Court (RTC) nitong Abril 8 na napunta kay Judge Max de Leon ng Branch 143, “There is no mistaking that [Cabañero] made mention of Miss Bikini Philippines for no other purpose but to generate publicity, if not sympathy, for her purported plight, to the prejudice of the goodwill of (the pageant and the organization).”
Humihingi rin ng dagdag na P400,000 ang Slimmers World International para sa corrective damages at P205,000 para sa legal costs.
Matatandaang si Cabañero ang ikalawang babaeng nagsampa ng kasong rape laban kay Navarro.
Batay sa rape complaint nito, Abril 24, 2010 nang gahasain siya ni Navarro.
Sunod na itinanggi ni Cabañero na nagbigay siya ng eksaktong petsa matapos lumabas na nasa concert si Navarro noong Abril 24, 2010.
Unang lumitaw na iniakusa ni Cabañero na nangyari ang rape sa sasakyan ng aktor matapos siyang sunduin nito sa Astoria Plaza Hotel sa Pasig City na roon naka-check in umano ang mga kandidata ng pageant.
Binago niya ito sa Millenia Suites nang itanggi ng Astoria at Miss Bikini Philippines na may kandidatang tumutuloy noon sa Astoria. (HNT)
