HATAW! D'yaryo ng Bayan hatawtabloid.com
ni Pilar Mateo
KAKAHIWALAY pa lang namin sa katsikahang si Aiko, ayun na ang paglalahad ni Darla Sauler sa Facebook ng umano’y pagtatapat sa kanya ni Ara Mina na nakunan pala ito noong buwan ng Disyembre ng nakaraang taon.
Ayon daw sa kuwento sa kanya ni Ara, halos isang buwan na ang dinadala nito sa kanyang sinapupunan nang makompirma ito nang magbakasyon sila ng live-in partner na si Bulacan, Bulacan Mayor Patrick Meneses.
Nang gawin niya ang huli niyang guesting sa MMK eh, nagdadalantao na pala ito. Kaya naman pala napansin din ang pagiging mataba ni Ara that time sa TV.
Ang plano pala eh, maging sorpresa ito sa lahat. Pero December 23, 2013 nga ito nakunan. At lumabas na raw agad ito sa Cardinal Santos Hospital kinabukasan kahit hindi pa nadi-D & G (dilation and cotterrage) o raspa dahil gustong makasama ang kanyang pamilya sa araw ng Pasko. Pero sa nasabing araw naman pumanaw ang kanyang lolo Mel (Mathay).
Ilang araw pa nga raw ang binilang bago siya sumailalim ng D&G dahil hindi naman siya dinugo. Nagkaroon siya ng spotting pero hindi raw ganoon karami ang dugong lumabas. Kaya ang D&G eh, February 18, 2014 na nangyari at na-discharge rin naman siya agad.
Hindi nga lang daw agad na nakompirma ni Ara ang nasabing balita dahil kinailangan pa nitong hintayin ang go signal ng kanyang partner tungkol sa kanyang miscarriage.
Kaya nga ayon kay Darla, ang mga hirit niyang biro sa kanyang close friend na aktres eh, ang tungkol sa wedding bells ng matagal nang hinihintay na mangyari sa dalawa. Madalas naman kasi itong iwasang pag-usapan ng nasabing Mayor.
Ang take ko naman, dahil nakakasama ko noon sa Bikram Yoga kay Al Galang ang dalawa, talagang nakita ko na si Ara na pinaghandaan ang pagiging misis. At maski ang support system niya sa bagay na ‘yun eh, handa na rin. Binigyan na nga siya ni Jessa Zaragoza ng libro tungkol sa pagbubuntis. Panay na rin ang punta niya sa kanyang OB-Gyne para maging mataos na ang magiging tahanan ng kanyang magiging supling. At sa yoga nga, natututuhan din namin kay guru Al ang mga tamang posisyon para madaling mabuntis o makabuo ng magiging baby nila ang isang couple.
This may not be the time yet. At malamang sa pagdating ng kanilang supling, Mr. And Mrs. Patrick Meneses na silang haharap sa mata ng Diyos at tao.
Ang gagandang mga kuwentong Aiko at Ara sa akin, ‘di ba?
