School principal kinatay sa N. Cotabato
KIDAPAWAN CITY – Hindi na umabot nang buhay sa pagamutan ang isang school principal matapos pagsasaksakin dakong 8:40 kamakalawa ng gabi sa lalawigan ng Cotabato.
Kinilala ang biktimang si Renato De Pedro, principal ng Lanao Kuran Elementary School sa Brgy. Lanao Koran, Arakan, North Cotabato.
Ayon kay North Cotabato PNP provincial director, S/Supt Danilo Peralta, binato ng hindi nakilalang kalalakihan ang bahay ng biktima sa Brgy. Tumanding sa bayan ng Arakan.
Bunsod nito, lumabas ang biktima ngunit ilang minuto lamang ang nakalipas ay humingi ng saklolo sa kanyang pamilya habang sapo ang katawan na tadtad ng saksak.
Naisugod pa si De Pedro sa Arakan District Hospital ngunit idineklarang dead on arrival ng attending physician.
Patuloy pa ang imbestigasyon ng pulisya para makilala ang mga salarin. (BETH JULIAN)
