Asian Track Championships magsisimula ngayong Miyerkoles (Marso 25) sa Lungsod ng Tagaytay

PANGUNGUNAHAN nina Asian Cycling Confederation (ACC) president na si Dato’ Amarjit Singh Gill at Chairman ng Philippine Sports Commission (PSC) na si Patrick Gregorio ang listahan ng mga kilalang opisyal ng palakasan para sa seremonya ng pagbubukas ng ika-45 Asian Cycling Confederation (ACC) Track Cycling Championships at ika-14 Asian Para Track Cycling Championships sa Miyerkules (Marso 25) sa Tagaytay CT Velodrome.

Makikiisa rin sina Pangulo ng Philippine Olympic Committee na si Abraham Tolentino kina Gill at Gregorio sa pagbubukas ng kampeonato na unang beses iho-host ng bansa mula noong 1995 na edisyon ng taunang kaganapan, na gaganapin sa bagong tayong Tagaytay CT Velodrome—isang 250-metrong indoor track facility na pasado sa pamantayan ng UCI.

“Ito ang pinakamalaking internasyonal na track cycling event na iho-host ng Lungsod ng Tagaytay, at ng bansa sa kabuuan, sa loob ng tatlong dekada,” ani Tolentino, na siya ring pangulo ng pambansang samahan ng cycling na PhilCycling.

“Sa dami ng kalahok, isa rin ito sa pinakamalaki sa kasaysayan ng ACC track championships,” dagdag pa niya.

Itatakda ang seremonya ng pagbubukas alas-9 ng umaga at magsisimula ang unang laban alas-10 ng umaga, kung saan mahigit 600 atleta mula sa 16 na bansa sa Asya ang lalahok sa track at para track events.

Suportado ng Alkalde ng Tagaytay na si Brent Tolentino ang kampeonato kasama ang PSC, MVP Sports Foundation, Sports Plus PH, Toyota, at Peak.

May 44 na gintong medalya ang nakataya sa Asian championships, habang 30 naman sa para track competitions na sabay na gaganapin hanggang Marso 31.

Kabilang sa mga kompetisyon sa ACC championships ang individual at team pursuit, sprint, keirin, elimination race, omnium, points race, scratch race, Madison, at 1-kilometro para sa parehong kategorya ng kalalakihan at kababaihan.

Sa para track cycling competitions naman, kabilang ang individual pursuit, 1,000 metrong time trial, sprint, elimination, scratch race, at mixed team at tandem sprints.

Ang mga bansang kalahok ay ang Chinese-Taipei, Hong Kong-China, Indonesia, India, Japan, Kazakhstan, Macao-China, Malaysia, China, South Korea, Saudi Arabia, Singapore, Thailand, United Arab Emirates, Uzbekistan, at ang host na Pilipinas. (POC/HNT)