HATAW! D'yaryo ng Bayan hatawtabloid.com
TATLONG most wanted persons (MWPs) sa municipal level kabilang ang isang senior citizen ang magkakasunod na naaresto ng pinagsanib na puwersa ng tracker team ng 2nd Bulacan Provincial Mobile Force Company at San Rafael Municipal Police Station sa San Rafael, Bulacan kamakalawa.
Batay sa ulat ni PMajor Michael Santos, force commander ng Bulacan 2nd PMFC, dakong 9:30
ng umaga nang unang madakip ang No. 3 MWP, isang 61-anyos lalaki.
Sinundan ito ng pagkaaresto sa No. 4 MWP, 49 anyos, lalaki, dakong 10:40 ng umaga; at ang No. 5 MWP ay 44-anyos lalaki, dakong 11:20 AM, pawang residente sa Barangay Tambubong, San Rafael.
Ang mga nasabing akusado ay naaresto sa bisa ng mga warrant of arrest na inisyu ng Regional Trial Court, Third Judicial Region sa Malolos City, Bulacan.
Kabilang sa mga kasong kinahaharap ng nasabing MWPs ay paglabag sa Section 10(a) ng RA 7610, Serious Illegal Detention, at Slight Illegal Detention (RPC Art. 268).
Ang mga akusado ay kasalukuyang nasa kustodiya ng 2nd PMFC para sa dokumentasyon at kaukulang disposisyon bago iharap sa hukuman na naglabas ng kani-kanilang warrant of arrest.
Ang matagumpay na operasyon ng Bulacan Police Provincial Office, sa pamumuno ni PColonel Angel Garcillano, provincial director, ay patunay ng matatag na dedikasyon laban sa kriminalidad. (MICKA BAUTISTA)
