HATAW! D'yaryo ng Bayan hatawtabloid.com
Naaresto ng mga awtoridad ang isang lalaking may kasong panggagahasa sa bisa ng warrant of arrest sa Brgy. Maasim, bayan ng San Rafael, lalawigan ng Bulacan, nitong Lunes ng hapon, 2 Marso.
Ayon sa ulat ni P/Lt. Col. Protom Guevarra Acop, acting chief of police ng San Rafael MPS, kinilala ang suspek na si alyas Ompong, 23 anyos, nakatala bilang Top 4 Most wanted Person sa provincial level, at residente ng Brgy. Sta. Lucia, San Miguel, Bulacan.
Inaresto ang suspek alinsunod sa Alias Warrant of Arrest para sa kasong Rape sa ilalim ng Article 266, Paragraph 1 ng Revised Penal Code, na may kaugnayan sa Criminal Case No. 3563-M-2025 na inilabas ni Presiding Judge Theresa Genevieve N. Co, ng Malolos City RTC Branch 17, na may petsang 3 Pebrero, 2026, na walang inirekomendang piyansa.
Isinagawa ang operasyon ng mga tauhan ng San Rafael MPS bilang lead unit, katuwang ang PIT Bulacan West RIU 3 na nagbigay ng intel support, na nagresulta sa matagumpay na pagkakaaresto ng akusado.
Ipinaalam sa naarestong akusado ang kaniyang mga karapatang konstitusyonal at kasalukuyang nasa kustodiya ng San Rafael MPS para sa kaukulang dokumentasyon at disposisyon bago ito i-turnover sa hukuman na naglabas ng nasabing warrant of arrest. (MICKA BAUTISTA)
