Dimayuga, Bouffaut kampeon sa National Age Group Triathlon Championships

SUBIC BAY – Nanguna ang Filipino-French na sina Diego Jose Dimayuga at Alaina Bouffaut ng Get Coach’d Academy, sa pamumuno ni Doray Ellis, sa super sprint U15 (13–15 taong gulang) na kategorya sa National Age Group Triathlon Championships na ginanap sa Subic Bay Freeport, Olongapo City noong Sabado.

Nagtala si Dimayuga ng oras na 31:46 upang makamit ang gintong medalya sa boys division. Pumangalawa ang kanyang kakamping si Pio Mishael Gabriel (33:31), na sinundan ni Joseph Ian Caluste ng BE TRITANS (34:15).

Nakamit din nina Bouffaut at ng kanyang kakamping si Naomi Rozeboom ang unang at ikalawang puwesto sa girls division ng naturang paligsahan na itinaguyod ng Philippine Sports Commission, Gatorade, Western Assurance, Z-Bitt, at SBMA Tourism.

Isinumite ni Bouffaut ang pinakamahusay na oras na 37:39.

Pumangalawa si Rozeboom sa oras na 37:51, habang pumangatlo si Lauren Lee Tan (37:55), na bahagyang nanguna laban kay Naomi Rosalie, kapatid ni Diego (37:56).

Si Dimayuga, ang pinakabagong kasapi ng national elite pool, at si Bouffaut ay nakatakdang lumahok sa Asian Junior and U23 Championships na gaganapin sa Mayo 12–15 sa Hong Kong.

Sa super tri kids division, kinoronahang kampeon sina Marcus Jayden Balaquit ng Wavemakers Swim Team at Danica Angodung sa 11–12 taong gulang na kategorya.

Sina Eli Juan Dela Cruz ng Team Megawide at Ami Takei ng Team Honu (9–10 taong gulang); Ethan Gregorio ng OJT at Francesca Bader Mendoza ng Gas Coaching/Ace Seawolves (7–8 taong gulang); at Jewel Hunter Galang at Ylianna Devera ng TLTG (6 taong gulang pababa) ang iba pang nagwagi sa paligsahang inorganisa ng Triathlon Philippines bilang bahagi ng kanilang grassroots at talent identification program. (TriPhil/HNT)